Былы камандуючы 58-й арміяй Узброеных сіл РФ генерал-маёр Іван Папоў, арыштаваны па падазрэнні ў махлярстве, запатрабаваў завесці справу пра дзяржздраду з прычыны ўцечкі сакрэтных дакументаў пра тое, што ён кіраваў наступленнем на Харкаўскую вобласць. Як расказаў РІА «Новости» адвакат затрыманага Сяргей Буйноўскі, адпаведная заява пададзеная ў Следчы камітэт РФ.
— Мы падалі заяву з просьбай правесці праверку і распачаць крымінальную справу па факце дзяржздрады ў сувязі з [крымінальнай справай супраць Папова ва Украіне], неяк трапілі сакрэтныя дакументы ў адкрыты доступ. Альбо гэта шпіянаж, — заявіў адвакат.
Як нагадваюць «Важные истории», на мінулым тыдні Служба бяспекі Украіны абвясціла Івана Папова ў вышук. 13 чэрвеня Харкаўская абласная пракуратура паведаміла, што яго падазраюць у вядзенні агрэсіўных ваенных дзеянняў праз кіраванне наступленнем на Ізюмскі, Харкаўскі і Чугуеўскі раёны з ліпеня да верасня 2022 года.
У паведамленні ведамства пералічаныя ўзбраення і вацсковыя фарміраванні, якія знаходзіліся ў аператыўным падначаленні генерала. Да яго прыкладзеныя дакументы, на адным з якіх стаіць грыф «Сакрэтна», і карта баявых дзеянняў.
Таксама сёння вайсковыя следчыя выставілі генералу канчатковае абвінавачанне. Да яго дададзены новы артыкул — пра службовую падробку. Абаронца Папова заявіў тэлеграм-каналу Baza, нібыта гэта звязана з тым, што «следства перажывае, што справа можа разваліцца».
Папова арыштавалі ў траўні па падазрэнні ў буйным махлярстве на суму больш чым 1 млн расійскіх рублёў. «Ён шкоды не выплачваў, віны не прызнае», — прыводзіць ТАСС словы крыніцы ў сілавых ведамствах.
У 2023 годзе Папова адхілілі ад пасады, паводле яго, за тое, што «на самым версе» выказаў прэтэнзіі да начальства і «акрэсліў усе праблемныя пытанні» расійскай арміі.