У Беларусі праходзяць масавыя затрыманні за ўдзел у пратэстах і па справе «Беларускага Гаюна», паведамляе праваабарончы цэнтр «Вясна» са спасылкай на затрыманых, якія выйшлі з ізалятара на Акрэсціна.
Паводле звестак праваабаронцаў, вельмі шмат затрыманняў праходзіць па артыкуле 361−4 Крымінальнага кодэкса (Спрыянне экстрэмісцкай дзейнасці) у рамках так званай справы «Беларускага Гаюна». Большасць затрыманых — мужчыны. Фігурантаў «справы Гаюна» адпраўляюць у СІЗА.
Акрамя таго, працягваюцца затрыманні па артыкуле 342 КК (Актыўны ўдзел у дзеяннях, якія груба парушаюць грамадскі парадак). Паступаюць паведамленні пра вялікую колькасць затрыманых. Гэта звязваюць з тым, што са жніўня гэтага года заканчваецца тэрмін даўнасці прыцягнення да крымінальнай адказнасці за ўдзел у пратэстах.
«На Акрэсціна затрыманыя па-ранейшаму ўтрымліваюцца ў нечалавечых умовах, у перапоўненых камерах», — паведамляюць праваабаронцы.
Нагадаем, маніторынгавы праект «Беларускі Гаюн» рэгулярна інфармаваў пра расійскія ўдарныя дроны, што заляталі ў нашую краіну. У лютым праект спыніў працу. Гэта адбылося пасля таго, як стала вядома пра ўцечку звестак «Гаюна» і людзі, якія адпраўлялі інфармацыю, аказаліся ў небяспецы.
З таго часу стала вядома як мінімум пра некалькі выпадкаў, падставай для якіх сталі дасланыя вясной 2022 года ў «Беларускі Гаюн» фота і відэа з расійскімі вайскоўцамі і тэхнікай. Усе затрыманні прайшлі ў сакавіку 2025 года, а затрыманым выставілі абвінавачанні ў «дапамаганні экстрэмізму» паводле ч. 4 арт. 361 КК. Яна прадугледжвае пакаранне ў выглядзе абмежавання волі ці пазбаўлення волі да сямі гадоў.
Чытайце таксама
