У выніку абстрэлу акупаванага Лісічанска 3 лютага загінулі кіраўнік МНС самаабвешчанай ЛНР і два мясцовыя дэпутаты. Пра гэта паведамілі акупацыйныя ўлады рэгіёна і расійскія СМІ.
Пра гібель так званага кіраўніка МНС самаабвешчанай ЛНР Аляксея Пацялешчанкі паведаміў Леанід Пасечнік. Вядома, што Пацялешчанка быў прызначаны міністрам у верасні 2023 года. Да гэтага ён займаў пасаду начальніка пажарна-выратавальнага атрада МНС Расіі па ЛНР.
Таксама РІА «Новости» паведамляе пра гібель двух мясцовых дэпутатаў.
Акупацыйныя ўлады Лісічанска заявілі, што 3 лютага УСУ нанеслі ўдар па Лісічанску, у выніку абрынуўся двухпавярховы будынак пякарні, загінулі 28 чалавек і яшчэ дзесяць пацярпелі. Сярод загінулых — цяжарная жанчына і пяцігадовае дзіця. Telegram-канал Astra са спасылкай на мясцовых жыхароў пісаў, што пад удар трапіў будынак рэстарана, у якім абедалі расійскія вайскоўцы.
На відэа, якое апублікавала расійскае МНС, на разбураным будынку відаць шыльда рэстарана «Адрыятык».
Украіна інфармацыю не каментавала.
Лісічанск — горад у Луганскай вобласці Украіны. З ліпеня 2022 года знаходзіцца пад расійскай акупацыяй.