Уладзімір Зяленскі параўнаў тое, што адбываецца ў Ізраілі і Украіне. Ён адзначыў, што міжнароднае права мусіць спыніць зло. Пра гэта ўкраінскі прэзідэнт заявіў падчас выступу на пленарным паседжанні Парламенцкай асамблеі NATO.
— Аднолькавае зло. І толькі адно адрозненне: там — тэрарыстычная арганізацыя, якая ўдарыла па Ізраілі, тут — тэрарыстычная дзяржава, якая ўдарыла па Украіне. Дэклараваныя намеры розныя, але сутнасць адна. Вы гэта бачыце. Бачыце такую ж кроў на вуліцах. Такія ж расстраляныя машыны цывільных. Такія ж целы закатаваных людзей, — сказаў Зяленскі.
Ізраільскія журналісты, якія працавалі ва Украіне, параўноўваюць тое, што адбылося ў іх краіне, з тым, што яны бачылі ў Бучы.
Зяленскі заявіў, што спыніць зло можна толькі аб’яднаўшыся і прымусіўшы яго прытрымлівацца міжнароднага права.
— Часам ад лідараў тэрарыстаў гучыць: а што за правілы, на якіх заснаваны міжнародны парадак? Нібыта яны не разумеюць… А гэта вельмі простыя правілы. Вельмі простыя. Не гвалтаваць жанчын. Не забіваць. Не лічыць дзяцей трафеямі. Не заліваць гарады і вёскі крывёю і не расстрэльваць машыны з цывільнымі. Не біць па мірных гарадах ракетамі і дронамі. І яшчэ адно правіла: пры любых умовах абавязкова прыцягваць тэрарыстаў і ўсіх, хто ім дапамагае, да адказнасці.
Зяленскі заклікаў «дзяржавы і парламенты быць яшчэ больш актыўнымі дзеля глабальнага адзінства».
— Хай кожны, хто спансаруе тэрор, адчуе сілу нашага з вамі гневу. І хай кожны, хто мае патрэбу ў дапамозе ў абароне ад тэрору, адчуе сілу нашай з вамі салідарнасці. Мы з вамі мусім мець магчымасць паабяцаць нашым дзецям, што пакінем ім свет, якім кіруе не кроў, пралітая злом, а свабода, гарантаваная правам.
Чытайце таксама
