У TikTok з’явілася відэа з пацукамі, якія разгульваюць у раёне сталічнага Камароўскага рынку. У заапарку лічаць, што гэта хатнія гадаванцы, якіх хтосьці выкінуў, і маразоў яны не перажывуць, піша дзяржагенцтва «Мінск-Навіны».
@dashdolls888 Выбросили домашних крыс на Кульман (
Адміністрацыя Камароўкі патлумачыла, што пацукоў падкінулі.
— Да нас пацукі ніякага дачынення не маюць, відэа знятае на скрыжаванні вуліц Кульман і Куйбышава, гэта адзін з кветнікаў побач з крытым паркінгам, — расказаў намеснік генеральнага дырэктара па развіцці Камароўскага рынку Іван Ткачук.
Заатэхнік 1-й катэгорыі сталічнага заапарка Ірына Орліс сцвярджае, што на відэа адназначна хатнія пацукі — пра гэта можна меркаваць з афарбоўкі і паводзін:
— У нашай краіне дзікія пацукі так нахабна сябе не паводзяць. Яны даўно вывучылі, што з імі змагаюцца, і так відавочна на кантакт не пойдуць. Адназначна нейкі бессаромны чалавек выкінуў хатніх гадаванцаў. І відавочна не пару дзён таму, калі ўлічыць, што мы бачым не толькі дарослых асобін, але і малых, што вывеліся, хутчэй за ўсё, у норцы, якую жывёліны абсталявалі ў каранях дрэваў, — расказала спецыялістка.
Паводле яе, хатнія гадаванцы кепска пераносяць маразы, і калі іх не адлавіць, то, хутчэй за ўсё, жывёлы загінуць.
Але замілоўвацца не варта: хатнія пацукі могуць быць больш небяспечныя, чым іх дзікія суродзічы, бо лепш ведаюць звычкі людзей і зусім нас не баяцца, а розныя захворванні пераносяць не горш.