Услед за прапагандыстамі на Мікіту Мелказёрава звярнулі ўвагу сілавікі. Адпаведнае паведамленне было апублікаванае ў неафіцыйным тэлеграм-канале ГУБАЗіКа.
«Дробны калабарацыяніст заслужыў +1 крымінальную справу і „кватэрнае пытанне“. Следчыя дзеянні па новым эпізодзе змагара Мелказёрава (ператрусы і допыты сваякоў) будуць праведзеныя з асаблівай стараннасцю», — гаворыцца ў паведамленні.
Нагадаем, напярэдадні былы кіраўнік Агенцтва тэленавін Белтэлерадыёкампаніі і дзяржтэлеканала СТБ Кірыл Казакоў заявіў, што асабіста гатовы расстраляць Мікіту Мелказёрава.
«Калі гэтая пачвара калі-небудзь захоча памяняць беларускі пашпарт, калі гэтая пачвара нарэшце захоча памяняць сабе зубы, калі проста гэтая пачвара нейкім чынам паспрабуе назваць сябе яшчэ беларусам, я, у прынцыпе, гатовы выступіць адным з удзельнікаў гэтай тройкі для таго, каб асабіста гэтую пачвару зжыць са свету», — заявіў Казакоў.
Ён таксама лічыць, што сваякі Мікіты Мелказёрава не павінныя глядзець у вочы іншым, «разумеючы, што гэта нарадзілася ў іх у сям'і». Казакоў таксама заклікаў сяброў блогера публічна ад яго адрачыся.
Нагодай для гэтага стала выказванне блогера пра тое, што кіраўнік партызанскага руху ў Беларусі Панцеляймон Панамарэнка быў «кавалкам лайна».
Мелказёраў жыве і працуе за межамі Беларусі.