Шэсць чалавек, у тым ліку двое дзяцей, загінулі ў Беларусі за два дні непагадзі, паведаміў начальнік Галоўнага ўпраўлення дзяржаўнай сістэмы папярэджання і ліквідацыі надзвычайных сітуацый і грамадзянскай абароны МНС Ігар Хадановіч у тэлеграм-канале МНС.
«З прычыны праходжання навальнічнага фронту і моцнага ветру пацярпелі 330 населеных пунктаў, зафіксавана больш за 1200 выпадкаў падзенняў дрэваў, пашкоджаныя дахі больш чым 700 жылых дамоў», — сказаў ён.
Паводле Хадановіча, пад паваленымі дрэвамі і элементамі даху загінулі шэсць чалавек, з іх два дзіцяці, траўмаваныя — 15.
Пры гэтым ён адзначыў, што пры высокіх тэмпературах магчымыя рэзкія змены ўмоваў надвор’я.
«Гэта можа суправаджацца шквалістымі парывамі ветру, навальніцамі, градам, падзеннем дрэваў», — падкрэсліў Хадановіч.
Таму МНС настойліва рэкамендуе ў непагадзь абмежаваць выхад з будынкаў, не хавацца пад дрэвамі, за рэкламнымі шчытамі, прыпынкамі, будынкамі, бо магчымае падзенне дахавых матэрыялаў.