Southwind Airlines адмяняе палётную праграму Мінск — Стамбул з 1 красавіка. Пра гэта праінфармавала сваіх партнёраў-турагентаў кампанія Pegas Touristik Belarus, паведамляе Рэспубліканскі саюз тураператараў (РСТА).
«Інфармуем пра адмену палётнай праграмы Мінск — Стамбул з 1 красавіка авіякампаніі „Южный Ветер“. Усе зарэзерваваныя заяўкі з вылетам 30 сакавіка і далей будуць ануляваныя», — паведамляе аператар.
Як кажуць у кампаніі Pegas Touristik, усіх турыстаў вывезуць, арганізацыйныя пытанні цяпер вырашаюцца. Частку турыстаў са Стамбула ўжо вывезлі, частку — вывозяць. Усім турыстам забяспечылі пражыванне і харчаванне. Вываз турыстаў ажыццяўляецца рознымі авіякампаніямі — у тым ліку «Белавіяй», AZUR air, «Аэрафлотам» і іншымі.
Нагадаем, авіякампаніі Southwind Airlines забаранілі лётаць над ЕС. Праз гэта борт, што днём 30 сакавіка вылецеў з Мінска ў Стамбул, змяніў траекторыю палёту. У выніку да месца прызначэння ён ляцеў больш чым на дзве гадзіны даўжэй, чым звычайна.
За авіякампаніяй Southwind Airlines стаіць уладальнік расійскага тураператара Pegas Touristik Рамазан Акпынар, а сам флот авіякампаніі першапачаткова складаўся з самалётаў расійскай авіякампаніі Nordwind Airlines.