У Польшчы з 31 студзеня ўступае ў сілу пастанова міністра ўнутраных справаў і адміністрацыі, якая прадугледжвае змены для ўладальнікаў карты паляка, паведамляе Цэнтр беларускай салідарнасці.
Дагэтуль беларусы з картай паляка атрымлівалі візу з лічбай 18 на візавым стыкеры, што палягчала іх ідэнтыфікацыю. Цяпер жа МУС Польшчы ўнесла змены ў працэдуру выдачы візаў замежнікам. Пасля ўнясення змяненняў ім будзе прысвоены нумар 23 у візавым стыкеры. Такія візы выдаюцца, у прыватнасці, удзельнікам праграмы Poland. Business Harbour, членам іх сем’яў, а таксама турыстам з неназванымі мэтамі.
Дзякуючы гэтым зменам беларускім уладам будзе складаней вылічыць наяўнасць карты паляка. Такое рашэнне было прынятае ў сувязі з тым, што расце колькасць рэпрэсій у дачыненні да беларусаў з такім дакументам.
Нагадаем, новыя палажэнні будуць распаўсюджвацца на новыя заяўкі, а таксама на тыя, якія былі пададзеныя, але не разгледжаныя да ўступлення пастановы ў сілу.