У Мінску затрымалі ўладальніка «Тапаса» Паўла Белага. Затрыманне адбылося на гэтым тыдні і звязанае з прэтэнзіяй фінансавых органаў. Пра гэта «Нашай Ніве» паведамілі некалькі не звязаных паміж сабой крыніц.
Крыніцы ў агульных рысах сцвярджаюць, што Белы нібыта не пагадзіўся з памерам выстаўленага адной з яго кампаній падатковага штрафу і адмовіўся плаціць дзяржаве налічанае. Гэта і стала падставай для затрымання.
«Можа, упёрся, можа, сапраўды няма грошай, бо часы цяпер іншыя», — каментуе гісторыю адзін з прадстаўнікоў мінскай бізнес-супольнасці.
Як мяркуецца, Павел Белы знаходзіцца ў СІЗА КДБ.
Павел Белы — хакеіст каманды Аляксандра Лукашэнкі. У нейкі час найлепшы бамбардзір і найлепшы галявы асістэнт Лукашэнкі. Таксама Белы — адзін з асноўных забудоўшчыкаў Мінска. Яму належыць мноства нерухомай маёмасці ў розных раёнах сталіцы, пераважна ў цэнтры і вакол Драздоў, дзе знаходзіцца адна з рэзідэнцый Лукашэнкі і катэджныя кварталы для чыноўнікаў.