У баях пад Бахмутам загінуў беларус Дзмітрый Гарлоўскі з Полацка. «Люстэрка» высветліла, што ён ваяваў на баку Расіі. У мужчыны засталося чацвёра дзяцей.
Дзмітрыю было 40 гадоў. Ён вырас у Полацку, тамсама скончыў 15-ю школу, ужо ў дарослым узросце пачаў ездзіць на заробкі ў Расію — у Маскву. У апошнія гады ён наогул пераехаў жыць у падмаскоўны горад Клін. Туды ў 2019-м мужчына перавёз з Полацка сваю другую жонку — педагога Таццяну (імя змененае). Пашпарт, відаць, не мяняў — прынамсі, знаёмыя Гарлоўскага не чулі, каб ён атрымліваў расійскае грамадзянства.
Паводле інфармацыі «Люстэрка», Дзмітрый вырашыў адправіцца на вайну, каб зарабіць грошай: фінансавае становішча сям'і было не найлепшым. Ваяваў ён у шэрагах расійскай арміі або стаў наймітам ПВК Вагнера, мы дакладна не ведаем, тое, што ён паехаў на вайну, сям’я трымала ў таямніцы нават ад сваякоў. Пры гэтым на старонцы яго жонкі шмат рэпостаў навін менавіта пра ПВК Вагнера.
Аднак панасіць вайсковую форму Гарлоўскі паспеў зусім нядоўга — менш за тры месяцы. Спачатку было навучанне, потым мужчыну адправілі на фронт, а ў выніку перакінулі пад Бахмут. Менавіта там праз месяц Дзмітрый загінуў.
Відаць, гэта адбылося 13 траўня. У гэтыя дні ў Бахмуце ішлі цяжкія баі за горад, украінскія войскі ажыццяўлялі актыўныя контратакі і прасоўваліся на некаторых участках — як выказаўся тады кіраўнік ПВК Вагнера Яўген Прыгожын, «УСУ рвуць флангі». Расіяне, спрабуючы наступаць на адных участках і перайшоўшы ў абарону на іншых, неслі вялікія страты.
Але жонка Дзмітрыя яшчэ амаль месяц не ведала пра гібель мужа. 11 траўня яна публікуе паштоўку «Вяртайцеся жывымі, мы молімся за вас» з фота расійскіх вайскоўцаў. Потым яе старонка ў «Аднакласніках» напоўненая цалкам жыццярадаснымі пастамі аж да 5 чэрвеня. А потым з’яўляюцца зусім іншыя публікацыі.
«Галоўнае — не падаць духам. Жыццё працягваецца… Наперадзе нас чакае шмат светлага…» — піша жанчына. Лайкае пасты: «Нельга змяніць дату нараджэння і дату смерці, усё астатняе — у нашых руках», «Пацаны ў акопах, дзякуй вам за ўсё». І публікуе верш, прысвечаны загінулым салдатам, суправаджаючы яго датай: «13.05.2023» з эмодзі слёз і разбітага сэрца.
Яшчэ адзін верш той самай тэматыкі Таццяна публікуе разам з іх з Дзмітрыем вясельным фота. Каментары да паста поўныя спачуванняў ад знаёмых.
«Помолчу, поклонюсь и поплачу, а потом о душе помолюсь. Знаю я, что не мог ты иначе. И теперь только скорбь, только грусть…» — завяршаецца верш. Далей на старонцы ўдавы песня Арбенінай «Я без цябе сірата», флэш-паштоўкі з надпісамі пра «салдат, якіх ужо няма з намі» і пра тое, як страшна, калі ад чалавека застаецца толькі фатаграфія.
Аднак загінулы муж пакінуў Таццяне яшчэ і траіх дзяцей: іх старэйшая дачка ўжо падлетак, сын толькі скончыў першы клас, а наймалодшай дзяўчынцы няма і дзевяці месяцаў.
Яшчэ адна дачка Дзмітрыя, ад першага шлюбу, жыве ў Полацку. Дзяўчына любіць мемы ў сацсетках, K-pop, Манетачку і Білі Айліш. На мінулым тыдні, 10 чэрвеня, яна адзначыла свой школьны выпускны.
За два дні да гэтага, 8 чэрвеня, палачаніна Дзмітрыя Гарлоўскага пахавалі ў расійскім Кліне.