Некаторым жыхарам Пінскага раёна не хапае грошай на паліва, каб абагрэць свае дамы ў халады. На дапамогу ім прыйшлі не чыноўнікі і прапагандысты, якія нядаўна калолі дровы, каб «сагрэць Еўропу», а валанцёры дабрачыннай арганізацыі «С добротой по миру», што расказалі ў сацсетках пра гэтую сітуацыю.
Па словах валанцёраў «С добротой по миру», яны ўжо атрымалі некалькі заявак з просьбай дапамагчы набыць дровы на зіму. Сярод асобаў, якія маюць у гэтым патрэбу, — простыя жыхары вёсак Пінскага раёна, у якіх не хапае грошай на паліва, каб абагрэць дамы ў халады.
Адна з такіх адзінокіх пенсіянерак — 84-гадовая Серафіма Міхайлаўна з вёскі Пучыны. Пенсіі ёй хапае хіба на лекі і ежу, а дроваў усяго некалькі стосаў — даводзіцца тапіць ўсяго раз на суткі і насіць пальчаткі. Жанчына папрасіла дапамогі ў набыцці дроваў у сельсавеце, але там, як выявілася, не хапае грошай і магчымасцяў. Тады валанцёры звярнуліся ў тэрытарыяльны цэнтр сацабслугоўвання, сумесна з якім ужо другі год арганізуюць закупку паліва.
Летась дабрачынная арганізацыя ўжо дапамагла з дровамі 8 жыхарам Пінскага раёна — адзінокім пенсіянерам і людзям з інваліднасцю. Добраахвотнікі распаўсюджвалі інфармацыю ў інтэрнэце, рабілі ахвяраванні, выязджалі разам на разгрузку дроваў і нават удзельнічалі цэлымі арганізацыямі. Агульны кошт набытых і дастаўленых дроваў склаў 1 856,79 рубля.
Сёлета любы ахвочы таксама можа паўдзельнічаць у ініцыятыве — напрыклад, зрабіць ахвяраванне. Спосабы дапамагчы — па спасылцы.
Нагадаем, напярэдадні цяперашняга ацяпляльнага сезона набліжаны да прэс-службы Аляксандра Лукашэнкі тэлеграм-канал «Пул первого» апублікаваў кароткі ролік, як Аляксандр Лукашэнка разам з набліжаным бізнесоўцам Сяргеем Цяцерыным коле дровы для «замерзлай Еўропы». У канцы кастрычніка супрацоўнікі дзяржаўных СМІ ў гонар гэтага правялі першы ў краіне чэмпіянат па колцы дроваў пад нефармальным лозунгам «Сагрэем Еўропу».
Праблемы з выкананнем заявак па торфе і дровах у Беларусі адзначаліся і раней. Так, у верасні мінулага года цяжкасці ўзніклі ў Мінскай вобласці. У Мінлясгасе гэта тлумачылі тым, што людзі сталі менш займацца самазагатоўкай дроваў, часцей заказваюць гатовую прадукцыю, а «тыя, хто дацягнуў да восені, сутыкнуўся з чэргамі ў асобных рэгіёнах».