Затрыманых у Тайландзе музыкаў гурта «Бі-2» мусілі дэпартаваць у Ізраіль, але пасля візіту «высокапастаўленых дыпламатаў з расійскага консульства» гэтае рашэнне адмянілі, паведамілі ў афіцыйным тэлеграм-канале калектыву.
Рашэнне дэпартаваць музыкаў з Тайланда ў Ізраіль было прынятае 29 студзеня. Для выканаўцаў ужо набылі білеты. Аднак на наступны дзень высветлілася, што ў Ізраіль удзельнікаў калектыву не адправяць.
«Сёння пасля візіту высокапастаўленых дыпламатаў з расійскага консульства прадстаўнікам групы было абвешчана, што рашэнне пра дэпартацыю ў Ізраіль адмененае. Удзельнікі гурта адмовіліся размаўляць з расійскім консулам. Удзельнікі гурта працягваюць утрымлівацца ў міграцыйным цэнтры ў агульнай камеры на 80 чалавек», — паведамілі ў тэлеграм-канале «Бі-2».
Раніцай 30 студзеня пра дэпартацыю ў Ізраіль чатырох з сямі ўдзельнікаў «Бі-2» паведаміла ізраільскае выданне Ynet. Пасля таго як інфармацыя разышлася ў СМІ, прадстаўнікі калектыву папрасілі не давяраць інфармацыі з іншых крыніц.
Расійскае выданне ТАСС раней пералічыла музыкаў «Бі-2» з расійскімі пашпартамі. Гэта бубнач Барыс Ліўшыц, флейтыст і клавішнік Ян Нікаленка, гітарыст Андрэй Званкоў, басіст Максім Андрушчанка і аранжыроўшчык Глеб Калядзін. Лідараў гурта агенцтва не згадала. Як пісала Ynet, ураджэнец Беларусі Лёва (Ягор Бортнік) заехаў у Тайланд па ізраільскім пашпарце. Шура (Аляксандр Уман) расказваў, што ў яго ёсць грамадзянства Аўстраліі і Ізраіля.
Паводле інфармацыі «Люстэрка», ні ў аднаго з удзельнікаў калектыву няма беларускага грамадзянства, хоць абодва заснавальнікі і салісты нарадзіліся ў Беларусі: Шура — у Бабруйску, Лёва — у Мінску.
Пра затрыманне музыкаў «Бі-2» стала вядома 25 студзеня. Тады паведамлялася, што супрацоўнікі аддзялення паліцыі ў Патонгу, курорце на заходнім узбярэжжы Пхукета, затрымалі сем чалавек — аднаго ізраільцяніна і шасцярых расіян, прычынай арышту стала адсутнасць дазволу на працу. Гэта былі ўдзельнікі рок-гурта «Бі-2». 26 студзеня суд горада Пхукет аштрафаваў кожнага з іх на 95 даляраў за тое, што выступалі ў Тайландзе з канцэртамі без адпаведнага дазволу.
28 студзеня музыкі выйшлі на сувязь і паведамілі, што знаходзяцца ў міграцыйнай турме.
«Сітуацыя і шум вакол яе падказваюць, што не апошнюю ролю ў нашым затрыманні адыграў ціск звонку. Мы ведаем, што прычыны гэтага ціску — нашая творчасць, нашыя погляды, нашая пазіцыя. У гэты момант мы чакаем пераводу ў Бангкок, дзе пытанне пра нашае знаходжанне ў Тайландзе мусіць канчаткова вырашыцца», — напісалі музыкі на афіцыйнай старонцы «ВКонтакте».
Неўзабаве пасля пачатку вайны гурт «Бі-2» быў вымушаны спыніць канцэрты ў Расіі. У красавіку артысты адмовіліся выступаць у Омску праз плакат «Zа президента» ў зале, пасля гэтага ўсе іх канцэрты ў РФ былі адмененыя або адкладзеныя надоўга наперад. У чэрвеньскім сінгле «Колыбельная», які «Бі-2» прысвяцілі загінулай у 2021 годзе сяброўцы, многія прыхільнікі ўбачылі антываеннае выказванне. Хадзілі чуткі, што гурт пакінуў Расію, аднак летам музыкі адказвалі на гэта, што знаходзяцца ў адпачынку. У апошнія месяцы калектыў родам з Бабруйска дае канцэрты ў розных краінах у межах свайго замежнага тура.
Чытайце таксама
