Першыя звесткі расшыфроўкі чорных скрыняў па катастрофе самалёта авіякампаніі AZAL у Актау не пацвярджаюць часткі інфармацыі пра інцыдэнт, якая фігуруе ў СМІ, заявіў кіраўнік МЗС РФ Сяргей Лаўроў на прэс-канферэнцыі пра вынікі замежнапалітычнай дзейнасці Расіі за 2024 год, піша «Інтэрфакс».
«Мы ацанілі, што азербайджанскія сябры неадкладна падтрымалі ўдзел Расійскай Федэрацыі, з улікам усіх фактараў, у расследаванні. Адбылася спецыяльная сустрэча ў Бразіліі, адкрылі чорныя скрыні, іх змесціва ўжо дало нямала цікавай інфармацыі, змест якой лішні раз пераконвае, што неабходна дачакацца паўнавартаснага расследавання», — сказаў Лаўроў.
Ён падкрэсліў, што да завяршэння расследавання не варта «нагнятаць атмасферу ў медыйнай прасторы, выкарыстоўваючы звесткі, якія, па вялікім рахунку, не пацвярджаюцца інфармацыяй з чорных скрыняў».
Нагадаем, 25 снежня паблізу казахстанскага горада Актау пацярпеў крушэнне пасажырскі Embraer 190 «Азербайджанскіх авіяліній» (AZAL). На борце самалёта, які ляцеў з Баку ў Грозны, знаходзіліся 67 чалавек, 38 з іх загінулі. У Актау самалёт скіраваўся пасля некалькіх спробаў здзейсніць пасадку ў Грозным. Не даляцеўшы да казахстанскага аэрапорта каля 3 км, ён пацярпеў крушэнне.
28 снежня Уладзімір Пуцін патэлефанаваў прэзідэнту Азербайджана Ільхаму Аліеву і папрасіў прабачэння за «трагічны інцыдэнт». На наступны дзень Аліеў абвінаваціў Расію ў спробе замяць прычыну крушэння самалёта. Ён заявіў, што на падлёце да Грознага паветранае судна было выведзенае з ладу сродкамі радыёэлектроннай барацьбы, а потым абстралянае, што прывяло да яго крушэння.
6 студзеня падчас сустрэчы са сваякамі загінулых у авіякатастрофе прэзідэнт Азербайджана Ільхам Аліеў зноў заявіў, што віна за крушэнне лайнера «ляжыць на прадстаўніках Расійскай Федэрацыі». Падчас сустрэчы ён таксама запатрабаваў пакарання для вінаватых, празрыстасці расследавання інцыдэнту і «чалавечых паводзінаў».
У Расіі на гэта адрэагавалі вельмі рэзка: напрыклад, сябра Каардынацыйнага савета пры Грамадскай палаце Расіі, палітолаг Уладзімір Карасёў назваў прэзідэнта Азербайджана Ільхама Аліева «пі****асам».