У Венесуэле затрымалі групу з сямі чалавек, якіх лічаць замежнымі наймітамі, трое з іх прыехалі з Украіны. Такую заяву зрабіў прэзідэнт Венесуэлы Нікалас Мадура, паведамляе Reuters.
Затрыманні адбыліся падчас апошняй аблавы перад чаканай інаўгурацыяй Мадура, якая адбудзецца ў канцы гэтага тыдня.
Паводле яго, сярод затрыманых таксама ёсьць двое грамадзян ЗША. Мадура заявіў, што яны былі «вельмі высокапастаўленымі», але не агучыў дадатковых падрабязнасцяў ці доказаў арыштаў.
«Толькі сёння мы захапілі сем замежных наймітаў, уключаючы двух важных наймітаў з ЗША», — сказаў Мадура, які збіраецца ўступіць на пасаду на трэці тэрмін у пятніцу пасля спрэчных выбараў, якія, як сцвярджае апазіцыя, выйграла яна, прычым пераканаўча.
Мадура таксама заявіў, што ў групе затрыманых — два калумбійцы, якіх, з ягоных словаў, арыштавалі ў неназваных частках Венесуэлы, а таксама трох іншых «наймітаў», якія прыбылі з Украіны.
Затрыманых падазраюць у тым, што яны планавалі «практыкаваць тэрарызм супраць венесуэльскага народа».
Мадура дадаў, што з лістапада да снежня ў краіне былі затрыманыя ўжо 125 замежнікаў з 25 розных краін.
Гэтыя заявы былі зробленыя на фоне таго, што апазіцыйны кандыдат у прэзідэнты Эдмунда Гансалес праводзіць турнэ па рэгіёне, спрабуючы павялічыць сваю міжнародную падтрымку. Гансалес быў абвешчаны абраным прэзідэнтам шэрагам краін рэгіёна, уключаючы ЗША.