Некалькі ракетных удараў нанесла расійская армія 17 красавіка па цэнтры Чарнігава. Паводле апошніх звестак, загінула 13 чалавек, атрымала раненні — больш за 60. Ідзе ратавальная аперацыя.
Выбухі прагрымелі ў густанаселеным раёне Чарнігава ўдзень 17 красавіка. Як паведаміў мэр горада Аляксандр Ламака, пад удар трапілі аб’екты цывільнай і сацыяльнай інфраструктуры.
«Прамое траплянне ў будынак сацыяльнай інфраструктуры. Гэта васьміпавярховы будынак. Візуальна разбураныя элементы сцен з шасці паверхаў — з трэцяга да шостага паверха і прыбудовы да яго», — расказаў Ламака.
Пашкоджаныя таксама чатыры шматпавярхоўкі, бальніца, установа вышэйшай адукацыі, дзясяткі аўто.
Як паведаміў міністр унутраных справаў Украіны Ігар Кліменка, колькасць загінулых павялічылася да 13 чалавек, атрымала раненні — больш за 60. Пад заваламі могуць знаходзіцца людзі.
«На жаль, колькасць загінулых можа вырасці. І гэтага не было б, калі б Украіна атрымала дастаткова сродкаў СПА і калі б рашучасць свету ў супрацьдзеянні расійскаму тэрору таксама была дастатковай», — пракаментаваў тое, што адбылося, прэзідэнт Украіны Уладзімір Зяленскі.
У Чарнігаўскую абласную бальніцу шпіталізавалі дзевяць чалавек, паведаміў дырэктар медустановы Андрэй Жыдзенка. Паводле яго, больш за ўсё раненняў — мінна-выбуховыя траўмы, чэрапна-мазгавыя траўмы, траўмы грудной клеткі, паражэнне сасудаў канечнасцяў.
«Трое ў цяжкім стане, астатнія ў стане сярэдняй цяжкасці. Больш за ўсё пацярпелых было дастаўлена ў Чарнігаўскую раённую бальніцу, бо яна знаходзіцца побач з эпіцэнтрам ракетнага ўдару», — цытуе Жыдзенку «Інтэрфакс-Украіна».
У Чарнігаўскім абласным цэнтры крыві звярнуліся да жыхароў з просьбай дапамагчы — патрэбная кроў, асабліва з адмоўным рэзусам.