У Мінску ўжо год пустуюць плошчы былой крамы дзяржсеткі «Радзівілаўскі» на першым паверсе жылога дома на Багдановіча, 147. Прычына ў тым, што праз пралікі будаўнікоў у доме здараюцца падтапленні, таму туды не хочуць прыходзіць інвестары, расказаў «Мінск-Навінам» кіраўнік адміністрацыі Савецкага раёна сталіцы Сяргей Хільман.
— Дом, у якім месціцца крама, размешчаны на скрыжаванні вуліц М. Багдановіча і Кульман. Праз дарогу — парк Дружбы народаў. Калі зазірнуць у гісторыю горада, то парк узнік на Камароўскім балоце. Тут знаходзілася Мінская балотная станцыя, пабудаваная яшчэ да рэвалюцыі, — расказаў чыноўнік.
Паводле яго, уся інфраструктура, пра якую ідзе гаворка, размясцілася на месцы былых багнаў.
— 60−70 гадоў таму інжынеры і будаўнікі дапусцілі пралікі, якія адбіліся на будынку. Дом гэты — не аварыйны, пагрозы жыхарам няма, аднак частка грунтовых водаў трапляе ў падвальныя памяшканні. Рашэнне знойдзенае — мяркуецца паставіць помпы, спецыяльныя валаўлоўнікі, якія пазбавяць падвалы ад вільгаці, — дадаў ён.
Сяргей Хільман паведаміў, што ва ўласніка памяшкання такія мерапрыемствы таксама неабходна правесці. Калі раней камунальнае прадпрыемства выкарыстоўвала плошчы пад гандлёвае памяшканне, то цяпер спрабуе здаць у арэнду.
— Я ведаю, што гэтае памяшканне выстаўленае на розных інтэрнэт-пляцоўках. Тут можна весці як гандлёвую, так і дзейнасць у сферы паслуг. Крытычнай праблемы няма, але бізнес ёсць бізнес. Можа, камусьці гэтае памяшканне па той цане, па якой яно прапануецца, пакуль не цікавае. Думаю, што працэс рухаецца. Усё ж гэта не ўскраіна Мінска, і новы арандатар, якому гэтыя памяшканні будуць цікавыя, усё ж знойдзецца, — пракаментаваў Хільман.
Нагадаем, дзяржаўную гандлёвую сетку «Радзівілаўскі» адкрылі ў 2003 годзе, а ў 2021-м кампанію прызналі банкрутам. У тым самым годзе стала вядома, што праблемная гандлёвая сетка пераходзіць пад крыло «Мінскага холадакамбіната № 2».
З таго часу некаторыя крамы гандлёвай сеткі пустуюць — гэта датычыць і пункта ля парку Дружбы народаў, што не працуе некалькі месяцаў. Зрэшты, як раней сцвярджалі гарадскія ўлады, універсам на Багдановіча, 147 прастойвае таму, што ў крокавай даступнасці знаходзіцца дастатковая колькасць гандлёвых аб’ектаў.