На сераду, 21 жніўня, у адной з абласцей абвясцілі чырвоны ўзровень небяспекі, а ў цэлым па краіне — аранжавы, паведамілі ў Белгідрамеце. Прычынай сталі спёка і моцныя навальніцы.
У паведамленні сіноптыкаў пра чырвоны ўзровень небяспекі гаворыцца, што ў сераду, 21 жніўня, у многіх раёнах Гомельскай вобласці тэмпература паветра дасягне +35°С.
А вось у папярэджанні пра аранжавы ўзровень гаворыцца, што ў той жа дзень на большай частцы тэрыторыі краіны і ў Мінску чакаюцца навальніцы, ноччу і раніцай месцамі, а ў Гродзенскай вобласці ў многіх раёнах моцныя залевы. Днём на захадзе падчас навальніцаў месцамі будзе шквалістае ўзмацненне ветру парывамі 15−20 м/с. У дзённыя гадзіны ў многіх раёнах тэмпература паветра дасягне +30…34°С, У Мінску +30…31°С.
Паводле прагнозу, 21 жніўня надвор’е ў Беларусі вызначаць атмасферны фронт і трапічная няўстойлівая паветраная маса, будзе воблачна з праясненнямі, атмасферны ціск будзе падаць.
А ў чацвер, 22 жніўня, ноччу і раніцай на большай частцы тэрыторыі, днём месцамі па краіне пройдуць кароткачасовыя дажджы. У асобных раёнах чакаюцца навальніцы, ноччу і раніцай — моцныя дажджы. Вецер заходняй чвэрці ўмераны, падчас навальніцаў — парывісты, ноччу і раніцай у асобных раёнах — моцны парывісты. Тэмпература паветра ўначы +12…19°С, днём +19…24°С, на паўднёвым усходзе Беларусі да +29°С.
У пятніцу, 23 жніўня, чакаецца пераменная воблачнасць і пераважна без ападкаў. Ноччу і раніцай у асобных раёнах слабы туман. Вецер пераменных кірункаў ад слабага да ўмеранага. Тэмпература паветра ўначы +7…13°С, днём +20…27°С.
Чытайце таксама
