У Беларусі захоўваюць актуальнасць клешчавыя інфекцыі Лайм-барэліёз і клешчавы вірусны энцэфаліт, паведамілі ў прэс-службе Мінздароўя.
Паводле звестак ведамства, за 6 месяцаў 2024 года ў арганізацыі аховы здароўя па медыцынскую дапамогу з нагоды прысмоктвання кляшчоў звярнулася больш за 15,3 тыс. чалавек. Найбольшая колькасць зваротаў зарэгістраваная ў Гродзенскай вобласці і Мінску.
У першым паўгоддзі 2024 года ў краіне зарэгістравалі больш за 80 выпадкаў клешчавога віруснага энцэфаліту і каля 700 выпадкаў Лайм-барэліёзу.
У Мінздароўя адзначылі, што самы эфектыўны сродак прафілактыкі клешчавога віруснага энцэфаліту — вакцынацыя.
У нашай краіне бясплатна вакцынуюцца работнікі, чыя прафесійная дзейнасць звязаная з выкананнем лесаўпарадкавальных работ на тэрыторыях нацыянальнага парку «Белавежская пушча», Бярэзінскага біясфернага запаведніка і іншых энзаатычных тэрыторыях. Іншым асобам правядзенне прафілактычных прышчэпак супраць клешчавога віруснага энцэфаліту праводзіцца за кошт уласных сродкаў.
Вакцынацыя праводзіцца ў адпаведнасці з інструкцыяй па медыцынскім выкарыстанні вакцыны. Як правіла, курс першаснай вакцынацыі складаецца з дзвюх дозаў, уведзеных з інтэрвалам ад аднаго да некалькіх месяцаў, што забяспечвае дастатковую абарону на сезон актыўнасці кляшчоў. Схема вакцынацыі мусіць быць завершаная ўвядзеннем трэцяй дозы вакцыны да пачатку наступнага сезона актыўнасці кляшчоў (то-бок праз інтэрвал да аднаго года пасля ўвядзення другой дозы). Наступныя бустарныя дозы ўводзяцца кожныя 3−5 гадоў у залежнасці ад ужытай вакцыны.
Для экстраннай прафілактыкі, калі неабходна дасягнуць хуткага імуннага адказу (напрыклад, у выпадку пачатку курсу вакцынацыі ў летні перыяд), інтэрвал паміж першай і другой дозамі можа быць скарочаны да 14 дзён.
«Калі вы знайшлі прысмактанага кляшча, то варта звярнуцца ў найбліжэйшую арганізацыю аховы здароўя, дзе вам акажуць медыцынскую дапамогу па яго бяспечным выманні. Калі магчымасць неадкладнага звароту ў арганізацыю аховы здароўя адсутнічае, выдаліць кляшча можна самастойна з выкарыстаннем спецыяльных прыладаў прамысловай вытворчасці, ніткавай пятлі або тонкага пінцэта. Важна кляшча дастаць цалкам, разам з хабатком, не раздушыўшы яго. Месца прысмоктвання варта апрацаваць любым спіртавым растворам», — расказалі ў Мінздароўя.
У выпадку самастойнага выдалення кляшча ўсё роўна неабходна наведаць участковага тэрапеўта ці доктара-інфекцыяніста, які прызначыць прафілактычнае лячэнне (яго максімальны эфект дасягаецца ў першыя 72 гадзіны пасля ўкусу кляшча).
На жаданне можна правесці лабараторнае даследаванне выдаленага кляшча на наяўнасць узбуджальнікаў клешчавога віруснага энцэфаліту, Лайм-барэліёзу, а таксама анаплазмозу і эрліхіёзу. Для яго транспартавання ў лабараторыю неабходна выкарыстоўваць чысты флакон (шкляны ці пластыкавы) са шчыльна прылеглай коркам. Па пытаннях правядзення лабараторных даследаванняў кляшчоў варта звярнуцца ў найбліжэйшы тэрытарыяльны цэнтр гігіены і эпідэміялогіі. Даследаванне кляшча неабавязковае і праводзіцца на платнай аснове.