У адным з самых чыстых азёр Беларусі, Свіцязі, забаранілі купацца дзецям і дарослым праз выяўленую кішачную палачку. Забарона дзейнічае з 22 ліпеня, паведамілі ў Навагрудскім занальным цэнтры гігіены і эпідэміялогіі (ЦГЭ).
Свіцязь знаходзіцца ў Навагрудскім раёне Гродзенскай вобласці, яго часта называюць адным з самых чыстых азёр у Беларусі. Аднак ва ўзятых на лабараторнае даследаванне пробах вады спецыялісты выявілі кішачную палачку (E.coli). З гэтай прычыны з 22 ліпеня ў Свіцязі, а таксама ў вадаёме на вул. Драздовіча ў Навагрудку забаронена купацца дарослым і дзецям. Заняткі воднымі відамі спорту пры гэтым не абмяжоўваюцца.
У Навагрудскім занальным ЦГЭ ўдакладняюць, што забарона дзейнічае да паўторных лабараторных даследаванняў на наяўнасць узбуджальнікаў і інфекцый, што перадаюцца з вадой.
Як піша расійскае інфармагенцтва Sputnik Беларусь, апошні раз такая праблема была тры гады таму. Прычына і цяпер, і тады аднолькавая: Свіцязь не вытрымлівае занадта вялікага патоку адпачывальнікаў, вада не паспявае ачысціцца.
Як паведаміў дырэктар рэспубліканскага ландшафтнага заказніка «Свіцязянскі» Дзмітрый Малахоўскі, на возера прыязджае адпачываць прыкладна ад трох да пяці тысяч чалавек у дзень. Паводле нормаў у летні сезон у заказніку можа знаходзіцца не больш за 1210 чалавек пры ўмове іх раўнамернага размеркавання па тэрыторыі. Але ў пікавыя дні колькасць адпачывальнікаў заўсёды перавышае норму як мінімум у два разы.
Праблема ў тым, што на ўсім возеры Свіцязь арганізаваны толькі адзін афіцыйны грамадскі пляж з постам ратавальнікаў. Менавіта ён канцэнтруе асноўныя патокі людзей. На тэрыторыі заказніка ёсць пляцоўкі для кэмпінгу, размешчаныя трохі ўбаку ад пляжа, закліканыя прыняць на сябе частку адпачывальнікаў. Але гэта толькі трохі ратуе сітуацыю.
— Рашэннем праблемы можа стаць арганізацыя другой афіцыйнай зоны адпачынку на беразе Свіцязі ў Карэліцкім раёне. Пляж і зона адпачынку на тэрыторыі нашага заказніка — адзіныя дазволеныя. Ёсць невялікі пляж з постам ратавальнікаў на тэрыторыі санаторыя, але яго не бяром у разлік, бо ён прызначаны толькі для жыхароў санаторыя, — прапанаваў рашэнне праблемы кіраўнік заказніка «Свіцязянскі».
На яго думку, з’яўленне новай зоны адпачынку на процілеглым беразе можа больш раўнамерна размеркаваць патокі адпачывальнікаў на беразе Свіцязі і перадухіліць з’яўленне ў вадзе небяспечных інфекцый.