У Гродзенскім абласным судзе пачалося закрытае разбіральніцтва па справе журналіста, чальца пазбаўленага рэгістрацыі Саюза палякаў Беларусі Андрэя Пачобута. Яго судзяць па артыкулах аб закліках да санкцый і распальванні варожасці.
Пачобута мусілі пачаць судзіць у Гродзенскім абласным судзе яшчэ 28 лістапада. Але разгляд справы некалькі разоў пераносілі: спачатку на 9 студзеня, потым на 16 студзеня.
Суд праходзіць у закрытым рэжыме, працэс вядзе суддзя Дзмітрый Бубенчык.
Як паведамляюць праўладныя тэлеграм-каналы, на слуханне справы прыехаў намеснік амбасадара Польшчы ў Беларусі Марцін Вайцяхоўскі.
Пачобуту выстаўленыя абвінавачанні па двух артыкулах КК:
- арт. 361 (Заклікі да дзеянняў, скіраваных на нанясенне шкоды нацыянальнай бяспецы Рэспублікі Беларусь);
- арт. 130 (Распальванне варожасці).
«Распальванне», сярод іншага, сілавікі ўбачылі ў выказванні журналіста пра агрэсію СССР супраць Польшчы ў 1939 годзе і ў яго артыкуле ў Gazeta Wyborcza: там ён расказваў пра жорсткае здушэнне паслявыбарчых акцый пратэсту ў ноч з 9 на 10 жніўня 2020 года.
Таксама Пачобута абвінавачваюць праз артыкул, апублікаваны ў выданні «Magazyn Polski» яшчэ ў 2006 годзе. Ён прысвечаны «Олеху» (Анатолю Радзівоніку), аднаму з камандзіраў Арміі Краёвай.
Нагадаем, Андрэй Пачобут знаходзіцца за кратамі з 25 сакавіка 2021 года. Разам з ім былі затрыманыя і іншыя актывісты Саюза палякаў: Ірэна Бярнацкая, Марыя Цішкоўская, Ганна Панішава і Анжаліка Борыс.
У чэрвені таго ж года траіх з пяцярых затрыманых (Панішаву, Цішкоўскую і Бярнацкую) выслалі ў Польшчу. Андрэй Пачобут і Анжаліка Борыс ад вызвалення ў абмен на дэпартацыю адмовіліся. Журналіст знаходзіцца ў зняволенні дагэтуль, а вось кіраўніцу Саюза палякаў Беларусі Анжаліку Борыс 25 сакавіка 2022-га выпусцілі з СІЗА пад хатні арышт — за кратамі яна правяла год.
Увосень КДБ уключыў Пачобута ў пералік «асоб, якія маюць дачыненне да тэрарыстычнай дзейнасці». Праваабаронцы прызналі журналіста палітычным зняволеным.
У снежні польская газета Wyborcza ўключыла Андрэя Пачобута ў спіс «герояў 2022 года». У польскім МЗС заявілі, што для яго вызвалення робяцца ў тым ліку непублічныя крокі.
— Мы няспынна патрабуем яго неадкладнага вызвалення. Мы робім таксама дзеянні, пра якія я не магу публічна гаварыць, — заявіў намеснік міністра замежных справаў Польшчы Павел Яблонскі. — Падобныя крокі мы рабілі і ў дачыненні да іншых асобаў, супрацьпраўна арыштаваных у Беларусі. Не ва ўсіх выпадках яны заканчваліся поспехам. Я запэўніваю, што кожны дзень мы дзейнічаем па пытанні вызвалення Андрэя Пачобута і іншых палітвязняў у Беларусі.
