У Мінску затрымалі супрацоўніка кампаніі Altapatri, якая дапамагала беларусам з атрыманнем грамадзянства Румыніі і «карт паляка». Пра гэта паведаміў неафіцыйны тэлеграм-канал ГУБАЗіК. Дзейнасць кампаніі назвалі «паўмахлярскай», але яе супрацоўніка затрымалі не за гэта.
Сілавікі зацікавіліся кампаніяй па наводцы прапагандыста, якога праўладныя СМІ называюць палітычным аналітыкам, Аляксандра Шпакоўскага. Той абурыўся, што ў Беларусі дзейнічае кампанія, якая займаецца «стымуляваннем эміграцыі».
Як вынікае з «пакаяльнага» відэа супрацоўніка кампаніі Altapatri, ён быў адзіным работнікам на тэрыторыі Беларусі. Мужчына агучыў расцэнкі, па якіх беларусам дапамагалі з дакументамі: 2 тысячы еўра за «карту паляка» і 4 тысячы еўра за пашпарт грамадзяніна Румыніі.
Пры гэтым падставай для яго затрымання стала не дзейнасць кампаніі.
«У тэлеграм-канал скінуў фатаграфію аўтамабіля супрацоўніка [адной з сілавых структур Беларусі]. За дадзенае дзеянне затрыманы», — кажа мужчына.
У тэлеграм-канале сілавікоў заявілі, што цяпер у іх распараджэнні ёсць «чарговая база з асабістымі звесткамі патэнцыйных і збеглых здраднікаў».