У выпадку прамога ваеннага сутыкнення з NATO ў беларускай арміі мала шанцаў перамагчы праціўніка на полі бою. Пра гэта падчас Усебеларускага народнага сходу 25 красавіка паведаміў Аляксандр Лукашэнка.
Значную частку свайго выступу на другім паседжанні УНС Аляксандр Лукашэнка прысвяціў пералічэнню вайсковых сіл і сродкаў NATO, якія размешчаныя ў Еўропе.
— Слухаючы сёння мой выступ, пералічэнні ўзброеных сіл, узбраенняў, якія паступаюць у арміі нашых суседніх краін, асабліва Польшчы і краін Балтыі (ды і Германіі — яны ж недалёка з намі), у вас можа ўзнікнуць пытанне: «А як ваяваць з імі?» — адзначыў Лукашэнка.
Палітык падкрэсліў, што «недружалюбныя» афіцыйнаму Мінску краіны «ўзброеныя да зубоў», колькасць узброеных сіл у іх «надмерная», размешчаныя яны «вельмі нязручна для нас: паўночны захад, захад, ды і на поўдні ў нас праблем дастаткова».
— Як ваяваць?! Мы і да размяшчэння [расійскай тактычнай] ядзернай зброі ў Беларусі арыентаваліся на тое, каб нанесці ім непрымальную шкоду. Каб яны разумелі, што мы можам ударыць так, што для іх гэта будзе непрымальна. Але не варта ставіць лоб у лоб і страляць адно ў аднаго. Мы выдатна разумеем, што гэта будзе вельмі цяжка, практычна немагчыма. Таму ў нас у ранейшых вайсковых дакументах былі прадугледжаныя факты і фактары нанясення непрымальнай шкоды, — сказаў Лукашэнка.
Міністр абароны Віктар Хрэнін дадаў, што пасля размяшчэння ў Беларусі расійскай тактычнай ядзернай зброі «ў нас ёсць поўны арсенал, каб нанесці непрымальную шкоду патэнцыйнаму агрэсару».
Нагадаем, 25 траўня 2023 года міністры абароны Беларусі і Расіі падпісалі дакументы, якія акрэсліваюць парадак утрымання расійскай нестратэгічнай ядзернай зброі ў спецыяльным сховішчы на тэрыторыі Беларусі. Кіраўнік расійскага вайсковага ведамства Сяргей Шайгу тады ўдакладніў, што Расія, размяшчаючы нестратэгічную ядзерную зброю на тэрыторыі Беларусі, не перадае яе рэспубліцы, кантроль над ёю і рашэнне пра выкарыстанне застаецца за Масквой.
Аляксандр Лукашэнка раней заяўляў, што расійскай ТЯЗ, якую размяшчаюць у Беларусі, кіраваць будзе Беларусь.
«Усё будзе па законе і па правілах. Бескантрольнай зброі ў Беларусі няма і быць не можа. Таму кіраваць усім тым, што ёсць у Беларусі, будзем мы тут», — сказаў Лукашэнка ў сваім пасланні беларускаму народу 31 сакавіка.
Зрэшты, гэтую ягоную заяву хутка абверглі ў Крамлі. Пазней і сам Лукашэнка прызнаў, што для выкарыстання размешчанай у Беларусі ТЯЗ яму трэба будзе стэлефанавацца з Пуціным.
Чытайце таксама
