У Беларусі найбліжэйшым часам вырастуць цэны на праезд у гарадскіх і рэгіянальных цягніках, а таксама на перавозку багажу. Гэта прадугледжвае пастанова МАРГ № 29 ад 15 красавіка, паведамляе Pravo.by.
Падаражанне закране білеты на цягнікі гарадскіх ліній, рэгіянальных ліній эканом-класа і бізнес-класа. Таксама вырасце кошт перавозкі багажу на гарадскіх, рэгіянальных і міжрэгіянальных маршрутах.
Так, тарыфы на перавозку пасажыраў на гарадскіх чыгуначных лініях вырастуць на 7 капеек у межах аднаго тарыфнага пояса (напрыклад, на напрамках Мінск — Гарадзішча, Мінск — Фаніпаль, Брэст — Жабінка і інш.), таксама ў межах двух тарыфных паясоў на адным кірунку (да прыкладу, Мінск — Негарэлае, Гродна — Скідзель і інш.).
У межах двух, трох і чатырох тарыфных паясоў на двух напрамках тарыфы павысяцца на 14 капеек.
Пры гэтым на білеты ў цягнікі з менш зручнымі адкіднымі сядзеннямі будзе дзейнічаць паніжальны каэфіцыент 0,7.
Нагадаем, апошні раз праезд па чыгунцы даражэў у чэрвені мінулага года — у некаторых выпадках тарыфы паднялі больш чым на 40%.
Дакумент пакуль не апублікаваны афіцыйна на Нацыянальным прававым інтэрнэт-партале. Ён набудзе моц праз пяць дзён пасля таго, як гэта адбудзецца.