Беларусы за студзень, хутчэй за ўсё, атрымаюць пацяжэлыя жыроўкі — кошт ЖКП у іх будзе палічаны паводле вышэйшых тарыфаў. Як заявілі ў МАРГ журналісту «Люстэрка» як фізасобе, рашэнне пра павелічэнне кошту гэтых паслуг вось-вось мусіць падпісаць Аляксандр Лукашэнка. Нагадаем, улады «забылі» зацвердзіць гэты дакумент — звычайна яго прымаюць у канцы папярэдняга года.
У МАРГ паведамілі, што з 1 студзеня на 0,5 базавай велічыні плануюць падняць тарыфы на ЖКГ, якія не дасягнулі 100-працэнтнага ўзроўню кампенсацыі эканамічна абгрунтаваных выдаткаў на іх аказанне. Цяпер праект указа пра гэта чакае падпісання Аляксандрам Лукашэнкам. Нагадаем, палітык трэці дзень знаходзіцца ў Расіі.
— Налічэнні за студзень яшчэ не рабіліся, іх будуць рабіць у лютым. Імавернасць 99,9%, што паслугі будуць падлічаныя па новых тарыфах. Чакайце, указ яшчэ не падпісаны і не апублікаваны, але спадзяёмся, што гэта будзе ў найбліжэйшыя дні, — паведамілі ў аддзеле жыллёва-камунальнай гаспадаркі МАРГ.
У Мінжылкамгасе раней заяўлялі, што ў 2024 годзе, як і ў 2023-м, тарыфы на ЖКП падаражэюць двойчы — з 1 студзеня і 1 чэрвеня. «З 1 студзеня будзе першае павелічэнне, — адзначалі ў гэтым ведамстве. — Гэтым пытаннем займаецца МАРГ. Але будзе невялікае павелічэнне — у межах паловы базавай велічыні па сярэдняй кватэры, на сёння гэта 18,5 рубля па сярэдняй кватэры. З 1 чэрвеня падаражэюць ацяпленне і гарачае водазабяспечанне. Як звычайна, у рамках вызначанага гадавога ліміту».
Гаворка пра субсідыяваныя тарыфы. Нагадаем, з 1 студзеня павысілі памер базавай велічыні — з 18,5 да 20 рублёў.
Нагадаем, яшчэ ў 2023 годзе тарыфы ЖКП падымалі ў межах 5 даляраў за год у разліку на тыпавую двухпакаёвую кватэру з трыма жыхарамі пры нарматыўным спажыванні паслуг. Аднак пазней чыноўнікі ўвялі змяненне і прывязалі рост тарыфаў на жыллёва-камунальныя паслугі да сумы базавай адзінкі. Жыроўка можа пацяжэць за год не больш чым на палову базавай.
Чытайце таксама
