Еўрасаюз рыхтуе новы санкцыйны пакет у дачыненні да Расіі. Ён можа быць прыняты ў наступным месяцы. Краіны Балтыі і Польшча выступаюць за тое, каб прывесці сектаральныя санкцыі ў дачыненні да Беларусі ў адпаведнасць з расійскімі. Пра гэта паведаміў журналіст «Радыё Свабода» Рыкард Ёзвяк, чые інсайды нярэдка спраўджваюцца.
У новы пакет санкцый можа ўвайсці забарона на імпарт расійскага звадкаванага прыроднага газу, алюмінію, павелічэнне колькасці абмежаванняў у дачыненні да авіяцыйнага сектара. Асобным пунктам вынесенае прывядзенне сектаральных санкцый у дачыненні да Беларусі ў адпаведнасць з расійскімі.
Нагадаем, у адказ на вайну, развязаную Расіяй супраць Украіны, Еўрапейскі саюз сумесна са сваімі міжнароднымі партнёрамі прыняў некалькі санкцыйных пакетаў супраць Расіі і Беларусі, але абмежаванні ў дачыненні да нашай краіны ўводзіліся радзей і не ў такім аб’ёме, як супраць РФ. У ЕС неаднаразова выступалі за тое, каб ураўнаваць санкцыйныя абмежаванні ў дачыненні да дзвюх краін.