За 2022 год насельніцтва Беларусі скарацілася амаль на 55 тысяч чалавек. Колькасць жыхароў дзвюх абласцей апусцілася ніжэй за адзін мільён, вынікае са звестак Белстата.
На 1 студзеня 2023 года насельніцтва Беларусі склала 9 200 617 чалавек. Гэта на 54 907 менш, чым год таму. Такое скарачэнне сувымернае з колькасцю такога райцэнтра як Кобрын, дзе жыве каля 52 тысяч чалавек.
Колькасць жыхароў Мінска другі год запар застаецца ніжэйшай за два мільёны чалавек. У дзвюх абласцях — Гродзенскай і Магілёўскай — колькасць жыхароў цяпер меншая за адзін мільён у кожнай.
| Вобласць/горад | 2022 | 2023 |
|---|---|---|
| Брэсцкая | 1324027 | 1315405 |
| Віцебская | 1103833 | 1091948 |
| Гомельская | 1357897 | 1347469 |
| Гродзенская | 1006614 | 998600 |
| Мінск | 1996553 | 1995471 |
| Мінская | 1465755 | 1462021 |
| Магілёўская | 1000845 | 989703 |
У пачатку года 7,212 млн чалавек жылі ў гарадах, 1,988 млн — у сельскай мясцовасці. Атрымліваецца, што за год гарады страцілі 19,7 тысячы чалавек, а вёскі — 35,2 тысячы.
Насельніцтва Беларусі скарачаецца шмат гадоў запар. З 2000 года ў нашай краіне стала на 801 918 жыхароў менш.
Нагадаем, у 2021 годзе падзенне колькасці насельніцтва Беларусі было рэкордным за апошнія дваццаць гадоў. Тады гэты паказчык скараціўся на 94,1 тысячы чалавек, а за год да гэтага — на 60,6 тысячы. Тэмп зніжэння колькасці людзей, якія пражываюць у нашай краіне, у гэтыя гады вярнуўся да ўзроўню пачатку нулявых.
