Па сутнасці, абразіўшы Зяленскага, Лукашэнка ахарактарызаваў сябе. Так «Люстэрку» пракаментаваў словы Аляксандра Лукашэнкі пра прэзідэнта Украіны Уладзіміра Зяленскага старшыня камітэта Вярхоўнай рады Украіны па знешняй палітыцы і міжпарламенцкім супрацоўніцтве Аляксандр Меражко.
«Сваімі дзікімі абразамі Лукашэнка паказаў свой найніжэйшы бандыцкі ўзровень. Па сутнасці, ён ахарактарызаваў сябе. Калі кіраўнік дзяржавы, нават нелегітымны дыктатар, замест рацыянальных аргументаў апускаецца да ўзроўню вулічнай лаянкі, то гэта сведчыць пра яго поўную безнадзейнасць. Відавочна, мінскі дыктатар канчаткова трапіў у залежнасць ад крамлёўскага дыктатара», — сказаў Меражко.
Што да заяваў Лукашэнкі пра тое, што Кіеў спрабаваў заключыць з Мінскам пакт аб ненападзе, то Меражко ўжо гаварыў пра тое, што словам Лукашэнкі «нельга верыць, бо ён часта робіць супярэчлівыя заявы, якія не адпавядаюць рэчаіснасці».
Нагадаем, сёння, 7 сакавіка, Аляксандр Лукашэнка пацвердзіў інцыдэнт у Мачулішчах, назваўшы яго «тэрактам». Ён абвінаваціў у гэтым «украінскага дыверсанта», 20 «памагатых» з Беларусі, СБУ і ЦРУ. Лукашэнка таксама заявіў, што Уладзімір Зяленскі не мог не ведаць пра такую аперацыю, і назваў яго «гнідай».
«Гніда таму, што ён бегае вакол Беларусі, пасылае да нас людзей і просіць, як я ўжо казаў: „Давайце заключым пакт аб ненападзе, давайце дамовімся, у нас з вамі няма ніякіх праблем“. На што я казаў: „Мы не збіраемся нападаць“. — „Не, давайце падпішам дамову пад заступніцтвам Арганізацыі Аб’яднаных Нацый, што вы на нас не нападзяце“. Вы чулі мае ўсе гэтыя заявы. І ў гэты час… Што ж, выклік кінуты», — дадаў Лукашэнка.
Пры гэтым Лукашэнка адзначыў, што Беларусь не мае намеру быць уцягнутай у вайну.