Стала вядома, на колькі падаражэлі білеты на цягнікі. Прыбаўка аказалася істотнай

З 6 ліпеня ў Беларусі падымуць тарыфы на пасажырскія чыгуначныя перавозкі. Гэта прадугледжваецца пастановай МАРГ. Падаражанне білетаў і правозу багажу закране цягнікі гарадскіх, рэгіянальных і міжрэгіянальных ліній. У некаторых выпадках тарыфы паднялі больш чым на 40%.

Што да білетаў на цягнікі рэгіянальных ліній, то падаражэюць як эканом-клас, так і бізнес. Да прыкладу, тарыф на праезд у электрычках вырасце з 29 да 35 капеек за адну зону праезду. Рост — на 20,7%.

Тарыф на цягнікі гарадскіх ліній у межах аднаго тарыфнага пояса (па напрамках Мінск — Гарадзішча, Мінск — Фаніпаль, Брэст — Жабінка і іншыя) вырасце на 29 капеек. Цяпер ён складае 1,44 рубля, а будзе — 1,73 рубля. Рост — на 20,1%.

Тарыф у гарадскіх электрычках у межах двух тарыфных паясоў на адным кірунку (Мінск — Чырвоны Сцяг, Мінск — Негарэлае, Гродна — Скідзель і іншыя) стане даражэйшым на 37 капеек (вырасце з 1,86 да 2,23 рубля). Рост — на 19,9%.

Тарыфы на праезд у цягніках бізнес-класа рэгіянальных ліній падымуць на ўзроўні 20%. Для дзяцей ад 5 да 10 гадоў падаражанне будзе прыкладна на такім жа ўзроўні.

Тарыфы на праезд у цягніках бізнес-класа міжрэгіянальных ліній павысілі ў сярэднім на 40%, але ў некаторых выпадках рост склаў нават крыху больш.

Таксама падымуць тарыфы на правоз багажу ў цягніках гарадскіх, рэгіянальных і міжрэгіянальных ліній.

Чытайце таксама